गजल

भूकम्प गएदेखि खोजेको खोज्यै छु !
जो भेटे पनि हो सोधेको सोध्यै छु !!

'देख्यौ कि तिमीले मेरी ती मायालाई ?'
यही नै प्रश्नले घोचेको घोच्यै छु !!

'आयो त' भन्नै पो नहुने भएको छ !
त्रासैले पानी झैँ पोखेको पोख्यै छु !!

कस्को पो आँखाले पिरेछ खै कुन्नी ?
भित्तोमा निधार ठोकेको ठोक्यै छु !!

भेटिनँ कतै लौ देखिनँ तिमीलाई !
यी आँखा आँशुमा चोपेको चोप्यै छु !!

न यता जाऊँ म न जाऊँ उता नै !
दोधारको चिसोले खोकेको खोक्यै छु !!

के गर्न सक्छु र भगवान छोडेर !
यी दुवै हातहरू जोडेको जोड्यै छु !!
(३ + ३ + ३ + ३ = १२)